നഗരാസൂത്രണ വിദഗ്ദരാവാന്‍ പ്ലാനിങ്ങിലെ വിവിധ കോഴ്സുകള്‍

സിവില്‍, ആര്‍കിടെക്ചര്‍ മേഖലയില്‍ അഭിരുചിയുള്ളവര്‍ക്ക് തിരഞ്ഞെടുക്കുവാന്‍ കഴിയുന്ന വ്യത്യസ്തമായൊരു കരിയറാണ് പ്ലാനിങ്ങ്. ഗ്രാമവികസനം, ട്രാന്‍സ്പോര്‍ട്ടേഷന്‍, ഉള്‍നാടന്‍ ജലഗതാഗതം, അനുബന്ധ നഗരപദ്ധതി തുടങ്ങിയ വിവിധ മേഖലകളിലേക്ക് വിദഗ്ദരെ ഇനിയും ആവശ്യമാണെന്നതിനാല്‍ ശോഭനമായൊരു കരിയര്‍ വാഗ്ദാനം ചെയ്യുന്നയൊരു പഠന മേഖലയാണിത്. കാലാവസ്ഥയും പ്രകൃതിയുമനുസരിച്ച് ഗ്രാമങ്ങളേയും പട്ടണങ്ങളേയും നിര്‍മ്മിക്കുകയും പുനര്‍സൃഷ്ടിക്കുകയും ചെയ്യന്ന വിദഗ്ദരാണിവര്‍.  ആയതിനാല്‍ തന്നെ സാമൂഹിക പ്രതിബദ്ധതയുള്ളയൊരു കരിയര്‍ കൂടിയാണിത്.  ഭൂകമ്പം ചാമ്പലാക്കിയ ഗുജറാത്തിലെ ഭുജും ഉത്തരാഖണ്ധിലെ ഗ്രാമങ്ങളുമെല്ലാം ഇന്ന് പ്ലാനിങ്ങ് വിദഗ്ദരുടെ മേല്‍ നോട്ടത്തില്‍ പുനസൃഷ്ടിക്കപ്പെടുകയാണിന്ന്. 

കോഴ്സുകള്‍

ബാച്ച്ലര്‍ ഓഫ് പ്ലാനിങ്ങ് (ബി പ്ലാനിങ്ങ്) ആണ് ഈ രംഗത്തെ ബിരുദ കോഴ്സ്. മാസ്റ്റര്‍ ഓഫ് പ്ലാനിങ്ങ്, പി എച്ച് ഡി ബിരുദം എന്നിവയ്ക്കും അവസരമുണ്ട്. നാലു വര്‍ഷങ്ങളിലെ എട്ട് സെമസ്റ്ററുകളിലായിട്ടാണ് ബി പ്ലാനിങ്ങ് കോഴ്സ് രൂപകല്‍പ്പന ചെയ്തിട്ടുള്ളത്. ലാന്‍ഡ് സര്‍വേ, പ്ലാന്‍ ആന്‍ഡ് പ്രിപ്പറേഷന്‍, അനാലിസിസ് ഡെവലപ്മെന്‍റ് ആന്‍ഡ് മാനേജ്മെന്‍റ്, ടീംസ് ഫോര്‍ സര്‍വേ, അര്‍ബന്‍ പ്ലാനിങ്ങ്, റൂറല്‍ പ്ലാനിങ്ങ്, റീജനല്‍ പ്ലാനിങ്ങ്, ഹൌസിങ്ങ്, ട്രാന്‍സ്പോര്‍ട്ട് പ്ലാനിങ്ങ്, ഇന്‍ഫ്രാസ്ട്രക്ചര്‍ പ്ലാനിങ്ങ് എന്നിവയാണ് വിഷയങ്ങളില്‍ ചിലത്. 

എനവിയോണ്‍മെന്‍റല്‍ പ്ലാനിങ്ങ്, റീജിയണല്‍ പ്ലാനിങ്ങ്, ഹൌസിങ്ങ്, ലാന്‍ഡ് സ്കേപ്പ് ആര്‍ക്കിടെക്ചര്‍ എന്നിവയില്‍ സ്പെഷ്യലൈസ് ചെയ്യാം.

ബി പ്ലാനിങ്ങിന് പ്രവേശനം ലഭിക്കുവാന്‍ പ്ലസ് ടു കഴിഞ്ഞ് ഐ ഐ ടി ജെ ഇ ഇ മെയിന്‍ ലിസ്റ്റില്‍ പേര് വരേണ്ടതുണ്ട്. NATA ടെസ്റ്റ് ഇതിനാവശ്യമില്ല.

എവിടെ പഠിക്കാം?

ബി പ്ലാനിങ്ങ്, എം പ്ലാനിങ്ങ്, പിഎച്ച്ഡി ഇവ പഠിക്കുവാന്‍ വളരെ കുറച്ച് സ്ഥാപനങ്ങളില്‍ മാത്രമാണ് അവസരമുള്ളത്. ഡല്‍ഹിയിലെ സ്കൂള്‍ ഓഫ് പ്ലാനിങ്ങ് ആന്‍ഡ് ആര്‍കിടെചര്‍ (http://spa.ac.in) ഈ മേഖലയിലെ ലോകപ്രശസ്ത സ്ഥാപനമാണ്. ഇതിന് ഭോപ്പാലിലും വിജയവാഡയിലും രണ്ട് സെന്‍ററുകള്‍ കൂടിയുണ്ട്. അഹമ്മദാബാദിലെ CEPT (http://www.cept.ac.in/) യൂണിവേഴ്സിറ്റിയാണ് മറ്റൊരു പ്രധാന കേന്ദ്രം. ഹൈദരാബാദിലെ ജവഹര്‍ലാല്‍ നെഹൃു ടെക്നോളജിക്കല്‍ യൂണിവേഴ്സിറ്റി, ന്യൂഡല്‍ഹിയിലെ AMITY യൂണിവേഴ്സിറ്റി എന്നിവിടങ്ങളിലും പഠന സൌകര്യമുണ്ട്. 

ജോലിസാധ്യതകള്‍

ഇന്‍ഡ്യയില്‍ EMBARQ India, L&T, IL & FS, Indian Institute of Remote sensing, Municipal Corporation of Delhi, National Capital Regional Planning Board, DMRC, Central Pollution Control Board തുടങ്ങിയ സ്ഥാപനങ്ങളില്‍ തൊഴില്‍ സാധ്യതയുണ്ട്. ബിരുദ പഠനം കഴിഞ്ഞ ശേഷവും ജോലി ലഭിക്കാത്ത സാഹചര്യമുണ്ടായാല്‍ www.itpi.org എന്ന സൈറ്റില്‍ ബന്ധപ്പെട്ടാല്‍ ഈ മേഖലയിലെ കരിയറിനെക്കുറിച്ച് കൂടുതല്‍ അറിയുവാന്‍ സാധിക്കും.